ARYNews.tv | Urdu – Har Lamha Bakhabar

Tag: Zia Lanjar

  • دھماکے میں ایک غیرملکی سمیت 8 افراد زخمی ہوئے، وزیرداخلہ

    دھماکے میں ایک غیرملکی سمیت 8 افراد زخمی ہوئے، وزیرداخلہ

    کراچی : وزیر داخلہ سندھ ضیاالحسن لنجار نے کہا ہے کہ کراچی ایئرپورٹ سگنل کے قریب ہونے والے دھماکے میں ایک غیر ملکی سمیت 8 افراد زخمی ہوئے۔

    جائے وقوعہ پر میڈیا سے گفتگو کرتے ہوئے ان کا کہنا تھا کہ اطلاعات ہیں کہ دھماکا آئی ای ڈی ہے، دھماکے کا نشانہ بننے والی گاڑی میں غیر ملکی شہری سوار تھے۔

    وزیرداخلہ سندھ نے کہا کہ دھماکے میں ایک غیرملکی شہری زخمی ہوا ہے، دھماکے کے مقام پر کافی گاڑیاں تباہ ہوئی ہیں، دھماکےمیں ایک پولیس افسر اور 3اہلکار بھی زخمی ہوئے۔

    ضیاالحسن لنجار کا کہنا ہے کہ دھماکے سے متعلق مزید معلومات حاصل کررہے ہیں، مزید شواہد کو دیکھ کر ہی کچھ کہا جاسکتا ہے۔

    انہوں نے بتایا کہ دھماکے کے مقام سے چینی افراد قافلہ پہلے ہی گزر چکا تھا جس کے فوری بعد دھماکا ہوا،
    وزیر داخلہ سندھ کا کہنا ہے کہ دھماکے سے متعلق کوئی سیکیورٹی الرٹ نہیں تھا، دھماکے میں 4پولیس اہلکار اور کچھ رینجرز کے اہلکار بھی زخمی ہوئے ہیں۔

    دھماکے کی اطلاعات سامنے آنے کے فوری بعد وزیر داخلہ سندھ ضیا الحسن لنجار نے سینئر سپرنٹنڈنٹ پولیس (ایس ایس پی) ملیر سے رابطہ کیا اور کہا کہ حقائق سے فی الفور آگاہ کیا جائے۔

    ایس ایس پی ملیر نے وقوعہ سے متعلق تمام حقائق جلد عوام کے سامنے لانے کی یقین دہانی کرائی اور کہا کہ علاقہ پولیس اور افسران جائے وقوع پر موجود ہیں۔

    وزیر داخلہ نے کہا کہ تفصیلات میں تمام پہلوؤں اور زاویوں کا احاطہ کیا جائے، ریسکیو کے عمل کو تیز کیا جائے اور متاثرہ شہریوں کو فوری ہسپتال منتقل کیا جائے۔

    وزیر اعلیٰ سندھ نے واقعے کی تحقیقاتی رپورٹ طلب کرلی 

    دوسری جانب وزیراعلیٰ سندھ سید مراد علی شاہ نے وزیر داخلہ اور آئی جی پولیس کو فون کرکے واقعے کی تفصیلات معلوم کیں۔

    سید مراد علی شاہ نے کہا کہ واقعے کی ہر پہلو سے انکوائری کرکے رپورٹ دیں اور ایئرپورٹ کے اطراف راستے ٹریفک کی روانی کے لیے بحال رکھیں۔

  • جنگی حالات ہو جائیں تو رینجرز کو اختیارات دیے جاتے ہیں، ضیا لنجار

    جنگی حالات ہو جائیں تو رینجرز کو اختیارات دیے جاتے ہیں، ضیا لنجار

    کراچی: وزیر داخلہ سندھ ضیا لنجار نے کراچی میں‌ امن قائم ہونے کی امید ظاہر کرتے ہوئے کہا ہے کہ اسٹریٹ کرائمز روکنے میں‌ کافی کامیابی ملی ہے، رینجرز ہمیشہ پولیس کی سپورٹ میں ہوتی ہے، جنگی حالات ہو جائیں تو رینجرز کو اختیارات دیے جاتے ہیں۔

    ضیا الحسن لنجار نے کہا کہ اسٹریٹ کرائمز میں لوگوں کے جان و مال کے ضیاع پر افسوس ہے، کوشش کر رہے ہیں کہ کراچی میں اسٹریٹ کرائمز پر قابو پائیں، پولیس اور رینجرز افسران سے امید ہے کہ وہ صورت حال پر قابو پالیں گے۔

    صوبائی وزیر داخلہ نے کہا پولیس نے کچھ دنوں میں بہترین کارکردگی دکھائی ہے، کئی مقامات پر چھاپوں میں کامیابی ملی، کراچی میں کافی اسٹریٹ کرمنلز کو گرفتار بھی کر لیا گیا ہے، رینجرز ہمیشہ پولیس کی سپورٹ میں ہوتی ہے، جنگی حالات ہو جائیں تو رینجرز کو اختیارات دیے جاتے ہیں۔

    ضیا لنجار کا کہنا تھا کہ آئی جی سندھ گھوٹکی میں ہیں،عید کے بعد میں خود بھی اس علاقے میں جا رہا ہوں، کچے کے ڈاکوؤں نے حکومتی رٹ کو چیلنج کیا ہے، وہ سرنڈر کر دیں ورنہ بہت سخت کارروائی ہونے جا رہی ہے، کچے کے ڈاکوؤں کے سپورٹرز کو بھی انتباہ ہے قبلہ درست کر لیں۔

    انھوں نے کہا کچے میں بے زمین ہاریوں کے لیے پالیسی بنائیں گے، اور علاقے کے نوجوانوں کو نوکریاں دیں گے، کچے میں مستقل تھانے اور چوکیاں بھی بنائی جائیں گی، پولیس اور پیراملٹری فورسز کی نقل و حرکت کے لیے سڑکیں بھی بنائیں گے۔

  • وزیر داخلہ سندھ کا ایس ایچ او گلشن معمار کو فوری معطل کرنے کا حکم

    وزیر داخلہ سندھ کا ایس ایچ او گلشن معمار کو فوری معطل کرنے کا حکم

    کراچی: وزیر داخلہ سندھ ضیا لنجار نے ایس ایچ او گلشن معمار کو فوری معطل کرنے کا حکم دے دیا ہے۔

    کراچی کے علاقے گلشن معمار میں آج پیر کو ڈکیتی کے دوران مزاحمت پر ایک کار سوار شہری کو گولی مار کر قتل کر دیا گیا تھا، جس پر وزیر داخلہ سندھ ضیا الحسن لنجار نے نوٹس لیتے ہوئے علاقے کے ایس ایچ او کی معطلی کا حکم دیا۔

    وزیر داخلہ سندھ نے ایس ایس پی ویسٹ سے واقعے پر فوری رپورٹ بھی طلب کر لی ہے، اور معطل ایس ایچ او کا جرائم کے خلاف کارروائیوں کا گزشتہ اور حالیہ ریکارڈ بھی طلب کیا۔

    واضح رہے کہ کراچی کے علاقے گلشن معمار میں ایک قتل کی واردات ہوئی، جس کے بارے میں بعد میں معلوم ہوا کہ وہ اسٹریٹ کرائم کی واردات تھی، دو موٹرسائیکل سوار افراد نے کار سوار کو روکنے کے لیے کہا لیکن گاڑی کے اندر سے ڈرائیور نے پستول دکھایا تو ڈاکوؤں نے اس پر فائرنگ کر دی۔

    اس واقعے میں ایک شخص جاں بحق جب کہ دوسرا زخمی ہو گیا ہے، یہ پچھلے تین ماہ میں اسٹریٹ کرائم کے دوران پچاسواں قتل ہے، جب کہ چند دن قبل پیپلز پارٹی کے وزیر داخلہ سندھ ضیا لنجار نے عجیب منطق بیان کرتے ہوئے کہا تھا کہ کراچی میں اسٹریٹ کرائمز کو بڑھا چڑھا کر بیان کیا جاتا ہے۔

  • عمران خان کا اپوزیشن لیڈر بننے کا خواب پورا نہیں ہوگا، ضیاء الحسن لنجار

    عمران خان کا اپوزیشن لیڈر بننے کا خواب پورا نہیں ہوگا، ضیاء الحسن لنجار

    کراچی : وزیر قانون سندھ ضیاالحسن لنجار نے کہا ہے کہ نوازشریف کا اداروں سے ٹکراؤ بڑا طوفان لا سکتا ہے، عمران خان کا اپوزیشن لیڈر بننے کا خواب کبھی پورا نہیں ہوگا۔

    ان خیالات کا اظہار انہوں نے کراچی میں میڈیا سے گفتگو کرتے ہوئے کیا، ضیاالحسن لنجار کا کہنا تھا کہ ن لیگ کی حکومت ملک میں تصادم کراناچاہتی ہے، لیگی حکومت ٹکراؤ کےبجائے مسائل کےحل کیلئےکام کرے۔

    شہبازاورنوازشریف عمران خان کی طرح یوٹرن لینے کے ماہر ہیں، نواز شریف کا اداروں سے ٹکراؤ بڑا طوفان لا سکتا ہے، سابق وزیر اعظم کو ان کے وزراء اور وکلا نے نقصان پہنچایا۔

    عمران خان کے حالیہ بیان پر تبصرہ کرتے ہوئے ان کا کہنا تھا کہ عمران خان سیاست کو کرکٹ سمجھ کرنہ کھیلیں، ان کا اپوزیشن لیڈر بننے کا خواب کبھی پورا نہیں ہوگا، سیاست کرنا عمران خان کے بس کی بات نہیں ہے، گرینڈ الائنس کا جلسہ بھی عمران خان کے جلسی کی طرح بری طرح فلاپ ہوگا۔

    صوبائی وزیر قانون نے کہا کہ پی ٹی آئی خود اندرونی اختلافات کا شکار ہے، پتہ ہی نہیں چلتا کہ پی ٹی آئی کی کمان عمران خان کے پاس ہے یاکسی اور کے پاس ؟

    کراچی میں خواتین پر چھریوں سے کیے جانے والے حملے کے ملزم کی عدم گرفتاری پر ضیا الحسن لنجار نے کہا کہ سندھ حکومت جلد چھری مار ٹولے کو قانون کی گرفت میں لائے گی، کراچی پولیس خواتین کی حفاظت کو یقینی بنائے۔

    انہوں نے کہا کہ وزیراعظم خاقان بھی نوازشریف کی طرح نوشہرو فیروز میں جھوٹے اعلانات کرینگے، شاہد خاقان عوام کوبتائیں وہ وزیراعظم ہیں یا نوازشریف کے سہولت کار؟

    سندھ کےعوام بھگوڑوں،طالبان کےحامیوں کومسترد کرچکے ہیں، ایک سوال کے جواب میں ان کا کہنا تھا کہ فنکشنل مسلم لیگ بھی ایم کیوایم کی طرح سندھ میں ختم ہوچکی ہے۔