پھوپھیاں آئیں، بیگم آئی، اب بچے آگئے تو کیا کرلیں گے؟ طلال چوہدری

وزیر مملکت برائے داخلہ طلال چوہدری کا کہنا ہے کہ بانی پی ٹی آئی کے بچے گولڈ اسمتھ کے پوتے بن کر یہاں سیاست کرنا چاہتے ہیں۔

قومی اسمبلی میں اظہار خیال کرتے ہوئے وزیر مملکت برائے داخلہ طلال چوہدری نے پھوپھیاں نکل آئیں، بیگم نکل آئی، اب بچے آگئے تو کیا کرلیں گے؟ احتجاج کریں، سو بار کریں ہم گرفتار نہیں کریں گے۔

انہوں نے کہا کہ آنٹی ریحانہ ہوں یا کوئی اور قانون اسی سال کا توڑے یا اٹھارہ سال کا ایک ہی بات ہے، کسی کو اڈیالہ جیل کا پنجاب پر حملہ آور نہیں ہونے دیں گے۔

انہوں نے کہا کہ آپ اپنے احتجاج کے پروگرام سے انتظامیہ کو آگاہ کیوں نہیں کرتے، آپ آگاہ کریں تو ہم سکیورٹی دیں گے، ڈپٹی کمشنر کو ڈاک کے ذریعے تین روز قبل آج کے احتجاج کا خط ملا، اس خط پر لکھے نمبروں پر کسی سے رابطہ نہ ہوا۔

طلال چوہدری کا کہنا تھا کہ کل یوم استحصال کشمیر اور پی ٹی آئی کے احتجاج پر میٹنگ کی،  میٹنگ میں سب کوکہا کہ ان سے رابطہ کریں اور پوچھیں کہاں احتجاج کرنا چاہ رہے ہیں لیکن کسی نے رابطہ نہیں کیا، میڈیا سے رات 10 بجے خبر ملتی ہےکہ کے پی ہاؤس میں اکھٹے ہوں گے اور اڈیالہ جائیں گے۔

وزیر مملکت نے مزید کہا کہ ہم ایسا نہیں ہونے دیں گے کہ مجمع اکٹھا ہو اور یہاں سے اڈیالہ جیل یا کسی جگہ پر حملہ کرے، یہ اپنے پروگرام سے متعلق ہمیں اطلاع کیوں نہیں دیتے، انتظامیہ کو آن بورڈ کیوں نہیں لیتے، یہ ہر اس دن اور موقع پر احتجاج کرتے ہیں جس دن سے پاکستان کا کوئی قومی مفاد وابستہ ہو۔