دنیا کے مقدس ترین شہر مکہ مکرمہ میں دنیا کا سب سے بلند مصلیٰ قائم کیا گیا ہے جس کو اب گنیز بُک آف ورلڈ ریکارڈ میں شامل کر لیا گیا ہے۔
عرب میڈیا کے مطابق یہ مصلیٰ 550 مربع میٹر کے رقبے پر محیط ہے جس میں بیک وقت 520 افراد نماز ادا کر سکتے ہیں۔ یہاں سے مسجد الحرام، خانہ کعبہ اور دیگر مقدس مقامات کا نظارہ بھی بخوبی کیا جا سکتا ہے۔
یہ مصلیٰ مسجد الحرام کے سامنے جبل عمر ہوٹل کی بالائی منزلوں میں شامل ہے جو اس ہوٹل کے دو ٹاورز کو جوڑنے والے پُل کے دائرے میں آتا ہے۔ یہ سطح سمندر سے 483 میٹر بلند اور داخلی راستے سے 179 میٹر اونچا ہے۔
فضا میں معلق معلق مصلیٰ کا ڈیزائن قدیم عرب اور عصر حاضر کے فن تعمیر کا خوبصورت امتزاج ہے۔ عربی رسم الخط کی تحریروں نے اس کے وقار اور حسن کو دو بالا کردیا ہے جب کہ اس پر خوبصورت رسم الخط میں درج اسمائے حسنیٰ عظیم اسلامی ورثے کا پتہ دے رہے ہیں۔
اس معلق مصلیٰ کی ایک خوبی یہ بھی ہے کہ نماز فجر کے بعد نمازی یہاں سے مکہ مکرمہ شہر پر طلوع ہونے والے سورج کا براہ راست نظارہ بھی کر سکتے ہیں۔
جبل عمر ڈیولپمنٹ کمپنی کے ایگزیکٹیو چیئرمین خالد العمودی نے گنیز بک آف ورلڈ ریکارڈ میں معلق مصلیٰ کے اندراج پر خوشی کا اظہار کرتے ہوئے کہا ہے کہ یہ اس بات کا ثبوت بھی ہے کہ ہم زائرین کو منفرد تجربات سے متعارف کرانے کا جو عہد کیے ہوئے ہیں اس پر پورا اتر رہے ہیں۔