اسلام آباد: مہنگائی کے خلاف ٹائیگرز فورس کا ایکشن کامیابی سے جاری ہے ، میگا کریک ڈاؤن میں کروڑوں کی ذخیرہ اندوزی پکڑی گئی جبکہ غیرقانونی اسٹاک قبضےمیں لے لئے گئے۔
تفصیلات کے مطابق مہنگائی کے خلاف ٹائیگرزفورس کا کامیاب ایکشن جاری ہے ، ٹائیگرزفورس کی اطلاع پرپنجاب بھرمیں انتظامیہ کی جانب سے کارروائیاں کی گئیں، خفیہ اطلاعات پر میگا کریک ڈاؤن میں کروڑوں کی ذخیرہ اندوزی پکڑی گئی اور گندم، چینی، چاول، آٹے، گھی کےغیر قانونی اسٹاک قبضے میں لے لئے گئے۔
معاون خصوصی عثمان ڈاراور چیف سیکرٹری پنجاب کی زیرصدارت اجلاس ہوا ، جس میں سیکرٹری انڈسٹری ظفراقبال اور چیئرمین پی آئی ٹی پی، اعلیٰ عہدیداران شریک ہوئے۔
اجلاس میں پنجاب میں ذخیرہ اندوزی کےخلاف جاری کریک ڈاؤن کی ماہانہ رپورٹ پیش کی گئی ، جس میں بتایا گیا کہ چھاپوں کے دوران 1300 ٹن چینی کے 25 ہزار تھیلے قبضے میں لئےگئے، قبضے میں لی گئی چینی کی مالیت 10کروڑروپے سے زائد ہے۔
رپورٹ میں کہا گیا کہ رواں ماہ 12کروڑ40 لاکھ روپے کی ناجائز ذخیرہ اندوزی پکڑی گئی، ملوث افراد پر5 کروڑ 14 لاکھ سے زائد کے بھاری جرمانے کئے گئے جبکہ اوورچارجنگ پر1288ایف آئی آردرج اور 1200 افراد کو گرفتار کیا گیا۔.
اجلاس میں رواں سال اپریل سےاکتوبرتک کے بھی اعدادوشمار بھی پیش کئے گئے ، جس کے مطابق اپریل سےاب تک7ارب10کروڑ کی ذخیرہ اندوزی قبضے میں لی گئی ، 6ماہ میں ذخیرہ اندوزوں پر59کروڑ66لاکھ32 ہزار کےجرمانےعائد کئے گئے جبکہ ،رپورٹ 9ہزار سے زائد ایف آئی آر درج اور 9543 افراد گرفتار کئے گئے۔
چیف سیکرٹری پنجاب نے کریک ڈاؤن کےنتائج پرانتظامیہ کوشاباش دیتے ہوئے ٹائیگرزفورس کی نشاندہی پرخفیہ چھاپوں کاسلسلہ جاری رکھنے کا فیصلہ کرتے ہوئے کہا وزیراعظم کی ہدایات کی روشنی میں کریک ڈاؤن کا عمل مزید تیز کیا جائے گا جبکہ نشاندہی کرلی گئی آئندہ چند روز میں بڑی ریکوریوں کا امکان ہے۔