’ٹک ٹاک اپنا دفتر پاکستان میں بھی کھول رہا ہے‘

وفاقی وزیر انفارمیشن ٹیکنالوجی امین الحق نے کہا ہے کہ سوشل میڈیا قوانین حتمی مراحل میں داخل ہوگئے ہیں اور ٹک ٹاک اپنا دفتر پاکستان میں بھی کھول رہا ہے۔

وفاقی وزیر آئی ٹی امین الحق نے میڈیا سے گفتگو کرتے ہوئے کہا کہ گوگل پاکستان میں اپنا دفتر قائم کر چکا ہے جب کہ ٹک ٹاک بھی اپنا دفتر پاکستان میں کھولنے جا رہا ہے۔

امین الحق نے مزید کہا کہ ہماری کوشش ہے کہ جو آئی ٹی کمپنی پاکستان میں نہیں آتی ان کا ایک ورچوئل آفس موجود ہونا چاہیے۔

انہوں نے کہا کہ سوشل میڈیا قوانین حتمی مراحل میں داخل ہوگئے ہیں۔ اس پر وزیر قانون کی سربراہی میں کمیٹی قائم کر رہی ہے، جلد مسودہ مکمل ہونے کے بعد اس کو وفاقی کابینہ میں منظوری کے لیے بھیجا جائے گا۔

واضح رہے کہ ٹک ٹاک پاکستان میں بھی ویڈیو اپ لوڈنگ کی مقبول ترین ایپ ہے اور ملک میں اس ایپ کے استعمال کرنے والوں کی تعداد کروڑوں میں ہے۔