ملک میں آج سونے کی قیمت کیا رہی؟

کراچی: ملک بھر میں سونے کی قیمت میں آج معمولی کمی کا رجحان رہا ہے۔

آل پاکستان جیمز اینڈ جیولرز ایسوسی ایشن کے مطابق سونے کی قیمت میں 500 روپے کم ہوگئی جس کے بعد فی تولہ سونے کی قیمت 2 لاکھ 50 ہزار 500 روپے ہوگئی۔

اسی طرح دس گرام سونے کی قیمت 429 روپے کمی کے بعد 2 لاکھ 14 ہزار 763 روپے رہی۔

عالمی مارکیٹ میں بھی سونے کی قیمت میں کمی کا رجحان رہا، سونا 11 ڈالر کم ہوکر 2391 ڈالر فی اونس رہا۔

واضح رہے کہ گزشتہ روز ملک میں فی تولہ سونا 1000 روپے اضافے کے بعد 2 لاکھ 51 ہزار روپے کا ہو گیا تھا۔

ایسوسی ایشن کا کہنا تھا کہ 10 گرام سونا بھی 857 روپے اضافے سے 2 لاکھ 15 ہزار 192 روپے پر پہنچ گیا ہے۔

سونا خریدنا روایتی طور پر محفوظ سرمایہ کاری سمجھا جاتا ہے جس کی قیمت افراط زر، سیاسی اور معاشی عدم استحکام کے اوقات میں بڑھ جاتی ہے۔

سونے کو صدیوں سے کرنسی اور دولت کی شکل کے طور پر استعمال کیا جاتا رہا ہے۔ جب سرمایہ کار دوسرے اثاثوں کے بارے میں غیر یقینی محسوس کرتے ہیں، تو وہ اکثر سونا خریدتے ہیں۔

پاکستان میں گذشتہ برس سونے کی قیمت کے تعین کے طریقہ کار میں تبدیلی کردی گئی تھی، جس کے تحت سونے کی قیمت انٹرنیشنل مارکیٹ ریٹ سے 20 ڈالر فی اونس زیادہ مقرر کی گئی۔