ایمسٹرڈیم : پاکستان اور ہالینڈ کے درمیان کھیلا جانے والا پہلا ہاکی میچ برابر ہوگیا، ٹوکیو اولمپکس کوالیفائنگ راؤنڈ کے میچ میں دونوں ٹیمیں مقررہ وقت میں 4-4 گول کرسکیں، دوسرا میچ 27 اکتوبر کو کھیلا جائے گا۔
تفصیلات کے مطابق ایمسٹرڈیم میں کھیلے جانے والے ٹوکیو اولمپکس کوالیفائنگ راؤنڈ میں پاکستان اور ہالینڈ کے درمیان پہلا میچ چار چار گول سے برابر ہو گیا۔
پاکستان کی طرف سے مبشر علی نے دو جبکہ محمد رضوان اور غضنفر علی نے ایک ایک گول کیا۔ پاکستانی ٹیم نے آغاز میں ہی جارحانہ انداز اپناتے ہوئے 5ویں منٹ میں پہلا گول کردیا۔
قومی ٹیم مبشر علی کی بدولت ابتدائی گول کرنے میں کامیاب ہوگئی، میزبان ٹیم نے مقابلہ برابر کرنے کی پوری کوشش کی اور20 ویں منٹ میں منک وینڈرویرڈن نے ہالینڈ کی طرف سے پہلا گول کر کے مقابلہ برابر کر دیا۔
بعد ازاں اگلے ہی منٹ میں بیورن کیلرمین نے ایک اور گول کر کے اپنی ٹیم کو برتری دلا دی تاہم غضنفرعلی نے جلد ہی حساب چکتا کر دیا اور مقابلہ پھر دو دو گول سے برابر ہو گیا۔
کھیل کے 38 ویں منٹ میں محمد رضوان نے گیند کو جال کے اندر پھینک کر ایک مرتبہ پھر قومی ٹیم کو برتری دلائی جو میچ کے52ویں منٹ میں اس وقت ختم ہو گئی جب رابرٹ نے گیند کو جال میں پھینک دیا اور میچ کا اسکور3-3 ہوگیا۔
میچ کے58ویں منٹ میں مبشر علی نے انفرادی طور پر دوسرا اور اجتماعی طور پر چوتھا گول کرکے پاکستان کو فتح کے قریب پہنچا دیا۔
کھیل کے آخری منٹ میں ہالینڈ کے منک وینڈر نے انفرادی طور پر دوسرا گول کر کے مقابلہ 4-4 سے برابر کر دیا۔ پاکستان اور ہالینڈ کی ٹیموں کے درمیان دوسرا میچ 27 اکتوبر کو کھیلا جائے گا۔