ایف آئی اے امیگریشن نے طورخم بارڈر پر کارروائی کرتے ہوئے مسافر سبحان اللہ کو 25 افغان پاسپورٹ سمیت گرفتار کرلیا۔
ایف آئی اے حکام کے مطابق پاسپورٹس کولڈ ڈرنکس کے کین میں چھپائے گئے تھے، برآمد ہونے والے پاسپورٹس پر تاجکستان کے ویزے لگے تھے۔
حکام کا کہنا ہے کہ گرفتار افغان شہری کا تعلق جلال آباد سے ہے، ملزم کو اینٹی ہیومن ٹریفکنگ سرکل پشاور منتقل کردیا گیا ہے۔
چند روز قبل ایف آئی اے اینٹی ہیومن ٹریفکنگ سرکل کوئٹہ نے کارروائی کرتے ہوئے بدنام زمانہ ایجنٹ نادر اور ساتھی حیدر کو گرفتار کیا تھا۔
ترجمان ایف آئی اے کا کہنا تھا کہ 4 بنگلادیشی شہریوں کو بھی حراست میں لیا گیا ہے۔
ایف آئی اے حکام کے مطابق ملزمان غیرقانونی طور پر ایران جانے کی کوشش کرتے ہوئے پکڑے گئے ہیں، بنگلادیشی شہریوں میں عتیق الرحمان، شمن، خیر الحسن اور رتن علی شامل ہیں۔
ابتدائی تفتیش میں بتایا گیا تھا کہ ملزمان غیرقانونی طور پر پاکستان میں داخل ہوئے، ملزمان ایجنٹوں کی مدد سے ایران جانے کی کوشش کررہے تھے۔
ایف آئی اے حکام کا کہنا تھا کہ ملزمان کو خفیہ اطلاع پر گرفتار کیا گیا ہے، مزید تفتیش جاری ہے۔