چمن: بلوچستان کے ضلع قلعہ عبداللہ میں سڑک کنارے بم دھماکا ہوا جس کے نتیجے میں قبائلی رہنما 2 محافظوں سمیت جاں بحق ہوگئے۔
تفصیلات کے مطابق بلوچستان کے ضلع قلع عبداللہ کے علاقے سپینہ غنڈی میں ہونے والے دھماکے میں مقامی قبائلی رہنما حاجی ولی اچکزئی 2 محافظوں سمیت جاں بحق ہوگئے، لاشوں کو گلستان اسپتال منتقل کردیا گیا۔
ڈپٹی کمشنر کا کہنا ہے کہ واقعہ دہشت گردی کا ہے یا قبائلی دشمنی جائزہ لے رہے ہیں۔
لیویز حکام کا کہنا ہے کہ دھماکے کے بعد گاڑی میں آگ لگ گئی، جس کے باعث متعدد افراد زخمی بھی ہوئے۔
لیویز حکام کے مطابق واقعے کی اطلاع ملتے ہی ریسکیو، پولیس اور لیویز کی ٹیمیں جائے وقوعہ پر پہنچ گئی ہیں اور فورسز نے علاقے کو گھیرے میں لے لیا ہے۔
رپورٹ کے مطابق دھماکے کے بعد مشتعل قبائلیوں نے کوئٹہ چمن شاہراہ بند کردی، کوئٹہ چمن شاہراہ کی بندش سے سیکڑوں مال بردار ٹرک، مسافر گاڑیاں پھنس گئیں۔
مزید پڑھیں: داتا دربار کے باہردھماکا، 10 افراد شہید، 25 زخمی
واضح رہے کہ آج صبح لاہور میں داتا دربار کے قریب ایلیٹ فورس کی گاڑی کے قریب دھماکا ہوا تھا جس کے نتیجے میں 5 پولیس اہلکاروں سمیت 10 افراد شہید اور 25 زخمی ہوگئے تھے۔
دھماکا اتنا شدید تھا کہ ایلیٹ فورس کی گاڑی مکمل طور پر تباہ ہوگئی جبکہ قریب کھڑی گاڑیوں کو بھی نقصان پہنچا۔
دھماکے میں شہید ہونے والوں میں ایک ہی خاندان کے تین افراد بھی شامل ہیں، دھماکے میں شہید ہونے والے باپ، بیٹا اور داماد ہیں، تینوں افراد وہاڑی سے داتا دربار آئے تھے، تینوں افراد کی لاشیں آبائی علاقے روانہ کردی گئیں۔