واشنگٹن (31 اگست 2025): امریکی صدر ڈونلڈ ٹرمپ نے واضح طور پر اعلان کیا ہے کہ امریکا اب یوکرین کو کسی قسم کی مالی یا فوجی امداد فراہم نہیں کر رہا اور نہ ہی اسے براہ راست فوجی سازو سامان دیا جا رہا ہے۔
اے پی پی کی رپورٹ کے مطابق امریکی صدر ڈونلڈ ٹرمپ نے اپنے حالیہ بیان میں کہا کہ ہم اس جنگ میں سیکڑوں ارب ڈالر خرچ کر رہے تھے لیکن اب ہم صرف نیٹو کو سازو سامان فروخت کر رہے ہیں۔
انہوں نے کہا کہ میں نے انہیں 2 فیصد سے 5 فیصد (جی ڈی پی کا) بجٹ مختص کرنے پر آمادہ کیا، ہم نیٹو کو فروخت کرتے ہیں یوکرین کو نہیں۔
یہ بھی پڑھیں: امریکا نے یوکرین کو فضائی دفاعی نظام کے فروخت کی منظوری
ڈونلڈ ٹرمپ کا مذکورہ بیان ایک ایسے وقت میں سامنے آیا ہے جب گزشتہ ماہ 14 جولائی کو انہوں نے اعلان کیا تھا کہ امریکا یوکرین کو ہتھیاروں اور فوجی سازو سامان کی فراہمی جاری رکھے گا۔
اس کیلیے انہوں نے شرط رکھی تھی کہ یورپی ممالک ان اخراجات کو برداشت کرٰن گے جبکہ اس عمل کی نگرانی نیٹو کرے گا۔
دوسری جانب روس کئی بار واضح کر چکا ہے کہ مغربی ممالک کی جانب سے یوکرین کو ہتھیاروں کی فراہمی اور فوجی تربیت کی حمایت نہ صرف جنگ کو طول دے رہی ہے بلکہ میدان جنگ میں صورتحال کو بدلنے میں بھی ناکام ہے۔