بالی ووڈ کی متنازع اداکارہ کنگنا رناوت نے 20 سالہ اداکارہ تنیشا شرما کی موت کو قتل قرار دے دیا۔
بھارتی میڈیا رپورٹس کے مطابق فلم ’فتور‘ میں کترینا کیف کے بچپن کا کردار نبھانے والی اداکارہ تنیشا شرما کی 24 دسمبر کو میک اپ روم سے لٹکی لاش برآمد ہوئی جسے ابتدائی طور پر خودکشی کا قرار دیا گیا تھا، اداکارہ کی موت سے متعلق پولیس تحقیقات کررہی ہے لیکن کنگنا رناوت نے اداکار سشانت سنگھ کی موت پر بھی اسے خودکشی نہیں موت قرار دیا تھا انہوں نے تنیشا کی موت کو بھی قتل قرار دیتے ہوئے پوسٹ شیئر کردی۔
میڈیا رپورٹس میں بتایا گیا کہ تنیشا اپنے سابق بوائے فرینڈ شیزان خان کے ساتھ میک اپ روم میں موجود تھیں جب وہ میک اپ روم کے واش روم میں گئیں تو کافی دیر ان کے باہر نہ آنے پر دروازہ توڑا گیا ان کی لاش برآمد ہوئی۔
واضح رہے کہ تنیشا کے ساتھ مبینہ طور پر میک اپ روم میں موجود سابق بوائے فرینڈ شیزان خان کو پولیس نے تفتیش کے لیے حراست میں لے رکھا ہے۔
تنیشا کی موت سے متعلق اداکارہ کنگنا نے انسٹاگرام اسٹوریز میں طویل پیغام شیئر کیا اور لکھا کہ ’ایک عورت ہر چیز کا مقابلہ کر سکتی ہے محبت کی، رشتے کی یا حتیٰ کہ کسی عزیز کی کمی کا ڈٹ کر مقابلہ کرسکتی ہے لیکن وہ کبھی بھی محبت میں ناکامی برداشت نہیں کرسکتی۔‘
اداکارہ نے شیزان کا نام لیے بغیر لکھا کہ ’دوسرے شخص کے لیے محبت اور کمزوری اس کا ہدف تھا اور اس نے صرف اس کا استعمال کیا۔‘
کنگنا رناوت نے واقعے کو قتل قرار دیتے ہوئے مزید لکھا کہ ’اگر ایسی حالت میں عورت اپنے تاثرات پر بھروسہ نہیں کرسکتی جس کو زندہ یا مردہ ہونے میں کوئی فرق ہے تو وہ انتہائی قدم اٹھانے کا فیصلہ کرتی ہے، یہ ایک قتل ہے، اداکارہ نے پوسٹ کے آخر میں تنیشا شرما کا ہیش ٹیگ بھی استعمال کیا۔
یاد رہے کہ کنگنا رناوت نے آنجہانی اداکار سشانت سنگھ خودکشی کیس میں بھی واقعے سے متعلق کہا تھا کہ سشانت نے خودکشی نہیں کی تھی اسے انتہائی قدم اٹھانے پر مجبور کیا گیا۔
