دنیا میں سماجی رابطوں کی مقبول ترین ویب سائٹ ٹوئٹر کا لوگو تبدیل کر دیا گیا ہے ایلون مسک نے نیلی چڑیا کو آزاد کرکے اس کی جگہ کتے کو دے دی ہے۔
سوشل میڈیا کی دنیا میں ٹوئٹر سماجی رابطوں کی مقبول ترین ویب سائٹ ہے۔ گزشتہ سال اس کو امریکی بزنس ٹائیکون ایلون مسک نے خریدا تھا جس کے بعد سے انتظامی سمیت کئی تبدیلیاں کی جاتی رہیں تاہم اب بڑی تبدیلی کر دی گئی ہے اور ٹوئٹر کی پہچان نیلی چڑیا کو آزاد کر دیا گیا ہے۔
ایلون مسک نے ٹوئٹر کا آئیکونک بیلو برڈ لوگو (چڑیا) کو کرپٹو کرنسی ڈوگی کوائن کے لوگو سے تبدیل کر دیا ہے۔ برسوں تک نیلی چڑیا ٹوئٹر کی پہچان رہی اب اس کی جگہ لوگو پر گولڈن کلر کے کتے کا چہرہ دکھائی دے گا۔
ٹوئٹر کے اس نئے لوگو کو ’’کوباسو‘‘ کا نام دیا گیا ہے جب کہ ایلون مسک نے اس تبدیلی کے حوالے سے ٹوئٹ بھی کی ہے۔
— Elon Musk (@elonmusk) April 3, 2023
ایک رپورٹ کے مطابق ایلون مسک کی جانب سے یہ اس وقت کیا گیا جب ان کے خلاف ڈوگی کوائن کے حوالے سے ایک مقدمہ دائر ہے۔ دوسری جانب ٹوئٹر لوگو کی تبدیلی سے ڈوگی کوائن کی قدر میں 30 فیصد اضافہ ہوا اور ایک کوائن 0.094 ڈالر کا ہوگیا۔
جون 2022 میں ایلون مسک کے خلاف ڈوگی کوائن میں سرمایہ لگانے والے افراد نے 285 ارب ڈالرز ہرجانے کا دعویٰ دائر کیا تھا۔ ان افراد کا مؤقف تھا کہ ایلون مسک 2019 سے جانتے تھے کہ اس کرپٹو کرنسی کی کوئی اہمیت نہیں مگر وہ اپنی تجارت کے لیے اسے پروموٹ کرتے رہے۔
ایلون مسک کے وکلا نے حال ہی میں اس مقدمے کو خارج کرنے کی درخواست بھی دائر کرتے ہوئے اسے ایک جائز کرپٹو کرنسی قرار دیا تھا۔
ٹوئٹر کے ہوم پیج پر ہی بلیو برڈ کا لوگو تبدیل نہیں ہوا بلکہ جب ویب سائٹ کو اوپن کرنے پر لوڈنگ اسکرین کی جگہ اس کتے کی تصویر نظر آتی ہے۔
ایلون مسک نے جب اپنی پوسٹ میں اس فیصلے کا اعلان کیا تو ایک صارف نے پوسٹ شیئر کرتے ہوئے لکھا کہ جو وعدہ کیا تھا وہی کیا۔
اسکرین شارٹ میں دیکھا جاسکتا ہے کہ ایلون مسک نے گزشتہ دنوں ایک نئے سوشل میڈیا پلیٹ فارم کی ضرورت کے حوالے سے سوال کیا تھاجس پر ایک ٹوئٹرصارف نے نئے پلیٹ فارم کی جگہ ٹوئٹرکا لوگو تبدیل کرنے کا مطالبہ کیا، جس پر ایلون مسک نے اس سے وعدہ کرلیا تھا۔
As promised pic.twitter.com/Jc1TnAqxAV
— Elon Musk (@elonmusk) April 3, 2023
تاہم کئی صارفین کو یہ سب کمپنی مالک ایلون مسک کی جانب سے اپریل فول کو تاخیر سے منانا نظر آتا ہے اور امکان یہی ہےکہ کچھ وقت کے بعد بلیو برڈ لوگو واپس آجائے گا، کیونکہ یہ تبدیلی صرف ویب ورژن پر ہوئی ہے، موبائل ایپ میں نہیں۔