گھوڑے کو کوڑے مارنے پر تین بار کی گولڈ میڈلسٹ برطانوی گھڑ سوار خاتون شارلوٹ ڈجارڈن کو پیرس اولمپکس سے باہر کردیا گیا۔
برطانیہ کی ٹیم جی بی کی مشہور گھڑ سوار شارلوٹ ڈجارڈن کی ایک ویڈیو منظر عام پر آئی تھی جس میں انہیں تربیتی سیشن کے دوران گھوڑے کو بار بار کوڑے سے مار رہی تھیں۔
اس واقعے کے بعد جانوروں کے حقوق کی تنظیم پیٹا نے اولمپک کھیلوں سے تمام گھڑ سواری کے مقابلے ختم کرنے کا مطالبہ کیا۔
39 سالہ ڈجارڈن نے لندن، ریو اور ٹوکیو اولمپکس میں 6 ڈریسیج میڈل جیتے تھے، انہیں پیرس میں ہونے والے اولمپکس گیمز سے باہر کر دیا گیا ہے، اور یہ فیصلہ اولمپکس کی افتتاحی تقریب سے چند دن پہلے سامنے آیا ہے۔
انہوں نے مجموعی طور پر 6 اولمپکس میڈل جیتے ہیں، جن میں 3 سونے، 2 چاندی اور ایک کانسی کا میڈل شامل ہے۔
برطانوی ڈریسیج اسٹار نے اپنی سوشل میڈیا پوسٹ میں کہا کہ ’انہوں نے ایک کوچنگ سیشن کے دوران غلطی‘ کرنے کی وجہ سے تمام مقابلوں سے دستبرداری اختیار کی ہے۔
ڈجارڈن نے اعتراف کیا کہ ایک ویڈیو سامنے آئی ہے، جو 4 سال پرانی ہے، اس میں انہوں نے ایسے رویے کا مظاہرہ کیا جو ان کی عام تربیت اور کوچنگ کے طریقہ کار کے برعکس ہے۔