دبئی : متحدہ عرب امارات میں عید الاضحیٰ کی سرکاری تعطیلات کا اعلان کردیا گیا جس کے تحت ملازمین کو چار دن کی چھٹیاں دی جائیں گی۔
اماراتی نیوز ایجنسی کی رپورٹ کے مطابق امارات کی وفاقی اتھارٹی برائے سرکاری انسانی وسائل نے گزشتہ روز ایک سرکلر جاری کیا جس میں عید الاضحیٰ کی سرکاری تعطیلات سے متعلق اعلان کیا گیا۔
امارات میں وفاقی وزارتوں اور اداروں کے لیے یوم عرفات اور عیدالاضحیٰ کی چھٹیاں 9 سے 12 ذی الحجہ تک ہوں گی۔
اس کا مطلب یہ ہے کہ سرکاری ملازمین ہفتہ اور اتوار کے علاوہ منگل 27 جون سے جمعہ 30 جون تک طویل تعطیلات کا لطف اٹھائیں گے تاہم عید کی چھٹیوں کے حوالے سے جاری کیا گیا بیان سرکاری اور نجی اداروں کے لیے منظور شدہ تعطیلات پر مبنی ہے۔
واضح رہے کہ امکان ہے سعودی عرب میں حج کا آغاز 26 جون سے ہوگا جس کے لیے دنیا بھر سے عازمین آئیں گے۔