ورلڈ کپ میں نیوزی لینڈ کے خلاف اہم میچ میں شاندار فتح کے بعد میچ کے چیمپئن فخر زمان اور کپتان بابر اعظم کے درمیان دلچسپ گفتگو ہوئی۔
ورلڈ کپ میں نیوزی لینڈ کے خلاف اہم میچ میں پاکستان نے شاندار فتح حاصل کی اور بارش سے متاثرہ میچ میں ڈک ورتھ لوئس سسٹم (ڈی ایل ایس) کے تحت 21 رنز سے جیت اپنے نام کی۔ میچ کی خاص بات فخر زمان کی 81 گیندوں پر کھیلی گئی 126 رنز کی نا قابل شکست دھواں دھار اننگ تھی جس نے رواں ورلڈ کپ کی کئی بیٹرز کی اننگ کو گہنا دیا جب کہ کپتان بابر اعظم نے بھی ناٹ آؤٹ 68 رنز بنا کر ان کا بھرپور ساتھ دیا۔
اس نا قابل یقین کارکردگی کے بعد میچ کے چیمپئن بیٹر فخر زمان اور کپتان بابر اعظم کے درمیان دلچسپ گپ شپ ہوئی جس کی ویڈیو پاکستان کرکٹ بورڈ نے سوشل میڈیا پر شیئر کر دی۔
اس گفتگو میں دونوں کھلاڑیوں نے میچ سے متعلق دلچسپ انداز میں گفتگو کی۔
کپتان بابر اعظم نے کہا کہ ہمارا پلان تھا کہ اگر فخر کھڑا ہو گیا تو 450 کا ہدف بھی ہم حاصل کر سکتے ہیں کیونکہ یہ جب بھی ایسی اننگ کھیلی ہے تو ہم نے وہ میچ جیتے ہیں۔ جب میں بیٹنگ کے لیے میدان میں گیا تو فخر نے مجھ سے کہا کہ پچ بہت اچھی ہے ہم نے صرف لمبی پارٹنر شپ کرنی ہے۔
بابر اعظم نے مزید کہا کہ جب ہم نے مل کر بیٹنگ شروع کی تو کم از کم 20 اوورز تک اس پارٹنر شپ کو لے کر چلنے کا ذہن میں تھا بارش کا خیال بھی نہ تھا کیونکہ اس وقت آسمان بالکل صاف تھا لیکن پھر اچانک بادل آئے تو ڈی ایل ایس کے تحت پلان کے تحت کھیلے اور کوشش کی کہ رن ریٹ 8 سے کم نہ ہو لیکن اس سے قبل ہی میرے بھائی (فخر) نے اپنا کام شروع کر دیا تھا۔
دوران گفتگو جب فخر زمان نے افتخار احمد کے حوالے سے بات کی تو بابر اعظم نے یہ بھی کہا کہ ان کے خیال میں پچ پڑھنا دو لوگوں کو سب سے زیادہ آتا ہے، ایک مصباح الحق اور دوسرا افتخار احمد۔
قومی کپتان نے کہا کہ فخر کو ہر چھکے کے بعد کہتا رہا کہ چھکا لگ گیا اب آرام سے کھیلو لیکن اس نے اپنی ہی کرکٹ کھیلی کافی چھکے زبردستی بھی مارے تو پھر میں نے کہا جیسے مرضی کھیلنا ہے کھیلو، بس گیم میں رہو۔ میں نے یہ کوشش کی کہ ایک اٹیک کرے اور میں وکٹ نہ گرنے دوں۔
بابر نے فخر سے پوچھا کہ تمہیں میچ میں کہا سے فلو ملا تو انہوں نے کہا کہ وکٹ کا دوسرے اوور میں ہی اندازہ ہو گیا تھا کہ بہت اچھا ہے جب ساؤتھی سے سوئنگ نہیں ہوئی۔ عبداللہ سے کہا کہ چار اوور گزار لیں پھر اٹیک شروع کریں گے لیکن عبداللہ کے جلد آؤٹ ہونے سے تھوڑا کنفیوژڈ ہوا لیکن پھر اپنا نیچرل گیم کھیلا۔
From intent to impact!
️ Join the conversation as @FakharZamanLive and @babarazam258 dish out the details of their match-winning partnership against New Zealand #NZvPAK | #CWC23 | #DattKePakistani pic.twitter.com/yMqWAuH3CG
— Pakistan Cricket (@TheRealPCB) November 4, 2023
فخر نے اپنی بہترین اننگ کے حوالے سے کہا کہ ورلڈ کپ چار سال بعد ہوتا ہے اور اس میں ایسی اننگ میری بہترین اننگ میں سے ایک ہے لیکن میرے دل کے قریب جو اننگ ہے وہ جنوبی افریقہ کی تیز وکٹ پر پروٹیز کے خلاف 193 رنز کی اننگ ہے۔
ان کا کہنا تھا کہ اتنے بڑے اسکور کے تعاقب میں بیٹرز کو بولر کو تھریڈ دینا چاہیے کیونکہ جب آپ حاوی ہوتے ہیں تو کام آسان ہو جاتا ہے اور میرا خیال ہے جیسی وکٹ تھی ہم نے نیوزی لینڈ سے 30 سے 50 رنز کم بنوائے۔