آتش فشاں سے گرم لاوا نکلتا تو اکثر نے دیکھا اور سنا ہوگا لیکن دنیا میں ایک ایسا آتش فشاں بھی ہے جو روزانہ لاکھوں روپے مالیت کا سونا اگلتا ہے۔
یہ عجیب وغریب آتش فشاں پہاڑ دنیا کے برفانی خطے براعظم انٹارکٹیکا میں ہے جس کا نام ایریبس ہے جس پر موجود آتش فشاں ہر روز تقریباً 80 گرام سونا اگلتا ہے جس کی مالیت 6 ہزار امریکی ڈالر پاکستانی کرنسی میں لگ بھگ 16 لاکھ 90 ہزار بنتی ہے۔
پہاڑ پر جب آتش فشاں سے گیس تیزی سے باہر نکلتی ہے تو اس کے ساتھ ساتھ سونے کے چھوٹے چھوٹے ٹکڑے بھی آسمان پر پھیل جاتے ہیں اور اطراف میں سینکڑوں میل دور تک گر جاتے ہیں۔
انٹارکٹیکا کے محققین نے آتش فشاں سے 621 میل دور فضا میں سونے پر مبنی دھول یا غبار کا پتہ لگایا ہے۔ 2017 کے مطالعے کے مطابق انٹارکٹیکا میں 138 آتش فشاں موجود ہیں جن میں سے تقریباً نو کے فعال ہونے کی اطلاع ہے اور اس میں سے ایک یہ ماؤنٹ ایربس ہے جو سب زیادہ مشہور ہے۔
یہ پہاڑ 1841 میں دریافت ہوا تھا جس کی بلندی 12,448 فٹ (3,794 میٹر) ہے۔ یہ ان تین آتش فشاں پہاڑوں میں سے بھی ایک ہے جو مل کر انٹارکٹیکا میں Ross نامی جزیرہ بناتے ہیں۔
سیٹلائٹ سے لی گئیں تصاویر ماؤنٹ ایریبس کے نیچے لاوے پر مبنی ایک جھیل کو ظاہر کرتی ہیں جو 1972 سے بھڑک رہی ہے۔ یہ آتش فشاں باقاعدگی سے گیس اور بھاپ کے شعلوں کو باہر کی طرف خارج کر رہا ہے اور جزوی طور پر پگھلے پتھروں کو بھی نکال رہا ہے۔