لاہور: قومی ٹیم کے چیف سلیکٹر وہاب ریاض کا کہنا ہے کہ فاسٹ بولر حارث رؤف ہمارا پروڈکٹ ہیں ان کا کیریئر ختم کرنے نہیں آئے ہیں۔
لاہور میں مقامی اسکول کی تقریب میں شرکت کے بعد میڈیا سے گفتگو کرتے ہوئے چیف سلیکٹر وہاب ریاض نے کہا کہ حارث رؤف کو شوکاز نوٹس سینٹرل کنٹریکٹ کی خلاف ورزی پر دیا گیا تھا۔
انہوں نے کہا کہ حارث رؤف کو بگ بیش کی اجازت کسی دباؤ میں آکر نہیں دی، این او سی دینے کا مقصد حارث رؤف کو مصروف رکھنا ہے۔
وہاب ریاض نے کہا کہ کپتان شان مسعود ڈومیسٹک کا بہترین پرفارمر ہے، اس کو پہلے مسلسل مواقع نہیں ملتے رہے۔
انہوں نے کہا کہ نیشنل ٹی ٹوئنٹی کے ٹاپ پرفارمرز کو بلائیں گے، کیمپ میں ڈومیسٹک کے پرفارمرز اور ٹی ٹوئنٹی کے ممکنہ کھلاڑیوں کو بلایا جائے گا۔
چیف سلیکٹر نے کہا کہ امید ہے 25 دسمبر تک نیوزی لینڈ کے خلاف سیریز کے لیے قومی ٹیم کا اعلان کر دیں گے۔
وہاب ریاض نے مزید کہا کہ ویمن کرکٹ ٹیم کو مبارکباد دیتا ہوں، ٹیم نیوزی لینڈ کیخلاف بہت اچھا کھیلی ہے۔