شوبز انڈسٹری کے معروف اداکار وہاج علی نے شادی سے انکار کے تین بہانے بتادیے۔
اے آر وائی ڈیجیٹل کے پروگرام ’گڈ مارننگ پاکستان‘ میں اداکار وہاج علی اور رمشا خان نے شرکت کی اور میزبان ندا یاسر کے سوال پر شادی سے انکار کے بہانے بتادیے۔
میزبان نے کہا کہ والدین آپ سے کہہ رہے ہیں کہ شادی کرلو لیکن آپ ان سے بہانے کررہے ہیں؟
وہاج علی نے کہا کہ ’ابھی میں ذہنی طور پر شادی کے لیے تیار نہیں ہوں، ابھی میری عمر ہی کیا ہے، میں نہیں چاہتا کہ آپ کو مشکل میں ڈالوں۔‘
انہوں نے ایک اور بہانہ بتایا کہ ’کیوں آپ ہنستا کھیلتا گھر برباد کرنا چاہتی ہیں۔‘
ایک سوال کے جواب میں وہاج علی نے کہا کہ ’شوبز میں عرصہ گزارنے کے بعد شخصیت میں بہت ٹھہراؤ آگیا ہے پہلے مجھے لگتا تھا کہ اس کردار کو ایسا کرنا چاہیے یا یہ ایسے ہوسکتا تھا لیکن اب میں سمجھتا ہوں کہ لوگ اگر مجھے اسکرین پر دیکھ کر خوش ہیں تو اچھا ہے۔
وہاج علی نے کہا کہ ڈرامہ سیریل بکھرے موتی کا گھر میں ایک سین چل رہا تھا جب میں گھر گیا تو والدہ وہ سین دیکھ کر رو رہی تھیں تو مجھے لگا کہ کوئی بات نہیں اگر کسی اور کو پسند نہیں آتا لیکن میں ڈیلیور کررہا ہوں تبھی ان کی آنکھیں نم ہوئی ہیں۔
واضح رہے کہ وہاج علی اے آر وائی ڈیجیٹل کے ڈرامہ سیریل ’مجھے پیار ہوا تھا‘ میں سعد کا مرکزی کردار نبھا رہے ہیں، دیگر کاسٹ میں ہانیہ عامر، زاویار نعمان ودیگر شامل ہیں۔
ڈرامے کی کہانی سدرہ سحر عمران نے لکھی ہے جبکہ اس کے ہدایت کار بدر محمود ہیں۔
وہاج علی اور عائزہ خان کا نیا ڈرامہ سیریل ’میں‘ جلد اے آر وائی ڈیجیٹل پر نشر کیا جائے گا جس کی پہلی جھلک گزشتہ دنوں جاری کی گئی تھی۔