کارڈف: ورلڈ کپ وارم اپ میچ میں بھارت نے مہندر سنگھ دھونی اور کے راہول کی سنچریوں کی بدولت بنگلہ دیش کو 95 رنز سے شکست دے دی۔
تفصیلات کے مطابق کارڈف میں کھیلے جانے والے میچ میں بنگلہ دیش نے ٹاس جیت کر پہلے بولنگ کا فیصلہ کیا، بھارت نے مقررہ اوورز میں 7 وکٹوں کے نقصان پر 359 رنز بنائے، ہدف کے تعاقب میں بنگلہ دیش کی ٹیم 264 رنز پر آل آؤٹ ہوگئی۔
بنگلہ دیش کی پہلی وکٹ 49 رنز پر گری جب سومیا سرکار 25 رنز بنا کر بمرا کی گیند پر کارتک کو کیچ دے بیٹھے، شکیب الحسن بغیر کوئی رن بنائے بمرا کی گیند پر کلین بولڈ ہوئے۔
لٹن داس نے 73 رنز کی اننگز کھیلی، مشفیق الرحیم نے 94 گیندوں پر 90 رنز بنائے ان کی اننگز میں 8 چوکے اور دو چھکے شامل تھے، مشفیق الرحیم کو اسپنر کلدیپ یادیو نے بولڈ کیا۔
لٹن داس اور مشیق الرحیم کے آؤٹ ہونے کے بعد کوئی بنگلہ دیشی بلے باز خاطر خواہ کارکردگی نہ دکھا سکا، محمد متھن بغیر کوئی رن بنائے پویلین لوٹ گئے۔
محمود اللہ 9 رنز پر کلدیپ یادیو کا شکار بنے، مصدق حسین کو بھی کلدیپ یادیو نے اسٹمپڈ آؤٹ کرایا۔
بھارت کی جانب سے کلدیپ یادیو نے تین کھلاڑیوں کو پویلین کی راہ دکھائی جبکہ بمرا اور چاہل نے دو، دو وکٹیں حاصل کیں۔
That's that from Cardiff, #TeamIndia win by 95 runs. pic.twitter.com/tuDveXagSp
— BCCI (@BCCI) May 28, 2019
اس سے قبل بھارت نے بیٹنگ کا آغاز کیا تو شیکھر دھون صرف ایک رن بنا کر پویلین لوٹ گئے جس کے بعد بھارت کی دوسری وکٹ 50 رنز پر گری جب روہت شرما 19 رنز پر روبیل حسین کا شکار بنے۔
کپتان ویرات کوہلی 47 رنز بنا کر آؤٹ ہوئے، وجے شنکر 2 رنز بنا کر روبیل حسین کی گیند پر مشفیق الرحیم کو کیچ دے بیٹھے۔
کے راہول نے 99 گیندوں پر 108 رنز کی شاندار اننگز کھیلی جبکہ مہندر سنگھ دھونی نے برق رفتار سنچری اسکور کی انہوں نے 78 گیندوں پر 113 رنز بنائے، دھونی کی اننگز میں 8 چوکے اور 7 چھکے شامل تھے۔
بنگلہ دیش کے روبیل حسین اور شکیب الحسن نے دو، دو وکٹیں حاصل کی، مستفیض الرحمان اور محمد سیف الدین نے ایک ایک وکٹ حاصل کی۔
واضح رہے کہ پہلے وارم اپ میچ میں نیوزی لینڈ نے بھارت کو 6 وکٹوں سے شکست دی تھی جبکہ پاکستان اور بنگلہ دیش کا وارم اپ میچ بارش کے باعث منسوخ کردیا گیا تھا۔