کراچی: قومی کرکٹ ٹیم کے کپتان سرفراز احمد کیپ ٹاؤن سے کراچی پہنچ گئے، سرفراز احمد کو آئی سی سی کی جانب سے چار میچز کی پابندی کا سامنا ہے۔
تفصیلات کے مطابق کپتان قومی کرکٹ ٹیم سرفراز احمد نے ایئرپورٹ پر میڈیا سے گفتگو کرتے ہوئے کہا کہ غلطی کا اعتراف کیا پھر بھی مجھے سزا ملی ہے، سابق فاسٹ بولر شعیب اختر مجھ پر ذاتی حملے کررہے ہیں۔
سرفراز احمد نے کہا کہ آئی سی سی نے مجھے سزا دی ہے، مستقبل میں واپس آکر اپنی کارکردگی کو مزید بہتر بناؤں گا، لوگوں کی جو محبت ملی اس کا شکر گزار ہوں۔
کپتان قومی کرکٹ ٹیم سرفراز احمد نے کہا کہ پی سی بی نے معاملے کو اچھے سے ہینڈل کیا۔
مزید پڑھیں: وسیم اکرم نے سرفراز احمد کی کپتانی کے حق میں آواز اٹھا دی
واضح رہے کہ سرفراز احمد کو جنوبی افریقی کھلاڑی فلک کوائیو پر جملے کسنے پر آئی سی سی کی جانب سے چار میچز کی پابندی کا سامنا ہے، آئی سی سی کے فیصلے کے بعد پی سی بی نے سرفراز احمد کو وطن واپس بلایا ہے۔
سرفراز احمد کی غیرموجودگی میں شعیب ملک ٹیم کی قیادت کررہے ہیں، پاکستان اور جنوبی افریقا کے درمیان پانچواں ون ڈے کل کیپ ٹاؤن میں کھیلا جائے گا۔
جو سچ ہے، جو حقیقت ہے، یہی دنیا ہے
قبل ازیں سرفراز احمد نے سوشل میڈیا ویب سائٹ ٹویٹر پر بچے کی وائرل ہونے والی ویڈیو شیئر کی۔
جو سچ ہے. جو حقیقت ہے.. یہی دنیا ہے pic.twitter.com/a9InsoQgaF
— Sarfaraz Ahmed (@SarfarazA_54) January 29, 2019