ایشیا کپ کے پہلے میچ میں نیپال کے خلاف کامیابی کے بعد بابر اعظم اور مکی آرتھر نے اسپیشل فیملی سے ملاقات کی۔
پاکستان کرکٹ بورڈ کی جانب سے سوشل میڈیا پر بابر اعظم کی میچ کے بعد ملتان کرکٹ اسٹیڈیم میں ایک اسپیشل فیملی سے ملاقات کی ویڈیو شیئر کی ہے۔
پی سی بی کی جانب سے شیئر کی گئی ویڈیو میں دیکھا جا سکتا ہے کہ قومی ٹیم کے کپتان بابر اعظم اور ڈائریکٹر کوچنگ اسٹاف مکی آرتھر ایک خصوصی فیملی سے ملاقات کر رہے ہیں۔
اس موقع پر بابر اعظم اور مکی آرتھر نے اسپیشل فیملی کو جرسیاں بھی تحفے میں دیں، بابر اعظم نے اسپیشل فیملی کو بتایا کہ جرسی پر ان کے دستخط بھی موجود ہیں جس پر اسپیشل جوڑے اور ان کے بچوں نے قومی ٹیم کے کپتان بابر اعظم اور مکی آرتھر کا شکریہ بھی ادا کیا۔
Connecting with the fans 👏
Babar Azam and Mickey Arthur share a post-victory moment with fans in Multan.#PAKvNEP | #AsiaCup2023 pic.twitter.com/JhuhzNWSHo
— Pakistan Cricket (@TheRealPCB) August 31, 2023
گزشتہ روز پاکستان اور نیپال کے درمیان ایشیا کپ کا افتتاحی میچ کھیلا گیا جس میں پاکستان نے نیپال کو 238 رنز سے شکست دی تھی۔
پاکستان کی جانب سے کپتان بابر اعظم نے شاندار بلے بازی کا مظاہرہ کرتے ہوئے 151 رنز کی اننگز کھیلی اور میچ کے بہترین کھلاڑی بھی قرار پائے۔