اسلام آباد: محکمہ موسمیات نے نئی موسمیاتی ایڈوائزری جاری کر دی جس کے مطابق ملک کے مختلف مقامات پر موسلادھار بارشوں کی پیشگوئی ہے۔
ایڈوائزری میں محکمہ موسمیات کی جانب سے بتایا گیا کہ 16 اگست کی شام کو بحیرہ عرب سے مون سون کی مضبوط ہوائیں داخل ہوں گی، بلوچستان اور سندھ میں 16 سے 18 اگست تک موسلادھار بارشوں کا امکان ہے۔
محکمہ موسمیات کے مطابق بالائی علاقوں میں 20 اگست تک بارشوں کا سلسلہ جاری رہے گا، سندھ اور بلوچستان میں نشیبی علاقہ زیر آب آ سکتے ہیں، بارشوں کے باعث اربن فلڈنگ سمیت ندی نالوں میں طغیانی کا خطرہ ہے۔
دو روز قبل محکمہ موسمیات نے مون سون کے نئے سسٹم سے متعلق الرٹ جاری کر دیا تھا جس میں بتایا گیا تھا کہ کراچی میں گرج چمک کے ساتھ بارش کا امکان ہے۔
محکمہ موسمیات نے بتایا تھا کہ 16 سے 19 اگست کے درمیان کراچی میں آندھی اور گرج چمک کے ساتھ بارش ہو سکتی ہے، مون سون کا نیا سلسلہ 16 اگست سے مشرقی سندھ میں داخل ہونے کا امکان ہے۔
میٹ ڈپارٹمنٹ کے مطابق اگلے 3 روز میں کراچی میں موسم ابر آلود اور بوندا باندی ہو سکتی ہے، آج کراچی، تھرپارکر، جامشورو، ٹھٹھ اور سجاول کے اضلاع میں ہلکی بارش کا بھی امکان ہے۔
پاکستان میں مون سون کی بارشوں کا دورانیہ اور اہمیت
پاکستان میں مون سون کی بارشوں کا دورانیہ عام طور پر جولائی سے ستمبر تک ہوتا ہے۔ یہ بارشیں ملک کے مختلف حصوں میں مختلف شدت اور مدت کے ساتھ برستی ہیں۔
مون سون کی آمد سے ملک کے کئی علاقوں میں خشک سالی کے بعد زندگی میں ایک نئی بہار آ جاتی ہے۔ یہ بارشیں نہ صرف زرعی پیداوار کے لیے بلکہ پانی کے ذخائر کو بھرپور کرنے اور موسم کو خوشگوار بنانے کے لیے بھی انتہائی اہم ہیں۔
تاہم، بعض اوقات یہ بارشیں اتنی شدید ہو جاتی ہیں کہ سیلاب کی صورت اختیار کر لیتی ہیں اور ملک کے مختلف علاقوں میں تباہی پھیل جاتی ہے۔ اس کے علاوہ، غیر متوقع اور بے وقت بارشیں بھی فصلوں کو نقصان پہنچا سکتی ہیں۔