عمرہ زائرین کو انشورنس سے کیا کیا فوائد حاصل ہوں گے؟

سعودی وزارت حج وعمرہ نے بیرون ملک سے آنے والے عمرہ زائرین کے لیے انشورنس پالیسی حاصل کرنا ضروری قرار دے چکی ہے جس کے اہم فوائد یہ ہیں۔

غیر ملکی میڈیا کے مطابق سعودی وزارت کا کہنا ہے کہ بیرون مملکت سے آنے والے عمرہ زائرین کے لیے انشورنس پالیسی حاصل کرنا ضروری ہے اور اسی وجہ سے عمرہ ویزے میں انشورنس کی فیس بھی شامل کی گئی ہے۔

وزارت کے مطابق جامع عمرہ انشورنس پالیسی میں ہنگامی صحت مسائل، کووڈ 19، عام حادثات، موت اور فضائی سفر میں تاخیر یا منسوخی سے پیدا ہونے والے مسائل کور کیے گئے ہیں۔ پالیسی کے ذریعے سے ایک لاکھ ریال تک کا نقصان پورا کیا جائے گا۔

وزارت کا کہنا ہے کہ انشورنس پالیسی کے 13 فوائد ہیں ان میں اسپتال میں علاج، ہنگامی زچگی، ٹریفک حادثات، ہنگامی ڈائلائسز اور اندرون و بیرون ملک فضائی ایمبولینس کی سہولت حاصل ہو گی۔

اس کے علاوہ عمرہ انشورنس پالیسی میں مکمل طور پر معذوری، عارضی معذوری، موت کا باعث بننے والے عارضی حالات، قدرتی آفات سے موت، متوفی کی میت لے جانے اور عدالتی فیصلے سے مقرر کی جانے والی دیت کو شامل کیا گیا ہے جب کہ پرواز میں تاخیر یا منسوخی پر بھی معاوضہ دیا جائے گا۔