اگر کسی کو مزدور کی جانب سے طلب کی گئی مزدوری زیادہ لگتی ہے تو وہ مزدور تبدیل کر لیتا ہے لیکن ایک شہری نے تو پلمبر کے ساتھ حیران کن برتاؤ کیا۔
روزمرہ کی زندگی میں ہر شخص کو گھر یا دفتر میں کسی نہ کسی کام کے لیے کبھی نہ کبھی کسی مزدور جیسا کہ پلمبر، الیکٹریشن، کار پینٹر کی ضرورت پڑتی ہے اگر مزدور توقع سے زیادہ مزدوری طلب کرتا ہے تو لوگ دوسرا مزدور تلاش کرتے یا اس سے سودے بازی کرتے ہیں لیکن اسپین میں تو ایک شخص نے گھر آئے پلمبر کو گن پوائنٹ پر یرغمال بنا لیا۔
غیر ملکی میڈیا کے مطابق اپنی نوعیت کا یہ منفرد واقعہ اسپین کے شہر مالاگا کا ہے جہاں ایک شخص نے پائپ ٹھیک کرنے کے لیے پلمبر کو گھر بلایا لیکن جب اس نے کام کی نوعیت دیکھنے کے بعد اپنا جو معاوضہ بتایا وہ اس شخص نے نزدیک زیادہ تھا لیکن اس نے بات چیت کے بجائے پلمبر پر ڈاکے کا الزام عائد کر کے گن پوائنٹ پر یرغمال ہی بنا لیا۔
رپورٹ کے مطابق نامعلوم پلمبر کو ایک شہری کی طرف سے کال موصول ہوئی جس میں اسے گھر میں پانی کے ٹوٹے پائپ کی مرمت کے لیے بلایا گیا۔ جب پلمبر نے مذکور مقام پر پہنچ کر اور کام دیکھ کر مزدوری بتائی تو مذکورہ شخص آپے سے باہر ہو گیا اور اس نے گھر کے اندر سے گن لاکر اس پر تان لی اور قتل کی دھمکی دیتے ہوئے اسے یرغمال بنا لیا۔
حملہ آور کے پڑوسیوں نے اپارٹمنٹ کی کھڑکیوں سے اونچی آوازیں سننے کے بعد پولیس کو اطلاع دی۔ جب پولیس افسران جائے وقوعہ پر پہنچے اور شہری سے یرغمالی کو آزاد کرنے کا مطالبہ کیا تو شہری نے انکار کر دیا اور دھمکی دی کہ اگر کوئی اس کے قریب بھی آیا تو وہ پاس رکھے سلینڈر کو دھماکے سے اڑا دے گا۔
تاہم پولیس نے مہارت کا مظاہرہ کرتے ہوئے حملہ آور کو غیرمسلح کرکے اسے فوری طور پر گرفتار کرلیا۔
پولیس نے تحقیق کے بعد شہری کو قصور وار قرار دیا اور کہا کہ ملزم کیخلاف مضبوط شواہد ہیں جس کی بنیاد پر اسے طویل مدتی قید کا سامنا کرنا پڑ سکتا ہے۔