سعودی عرب کے دارالحکومت میں ’’ریاض بس سروس‘‘ کے دوسرے مرحلے کا آغاز ہو گیا جس سے مسافروں کو کئی سہولتیں ملیں گی۔
غیر ملکی میڈیا نے سعودی عرب کے سرکاری خبر رساں ادارے ایس پی اے کے حوالے سے رپورٹ کرتے ہوئے کہا ہے کہ شاہ عبدالعزیز پبلک ٹرانسپورٹ منصوبے کے تحت ریاض بس سروس کے شروع کیے جانے والے دوسرے مرحلے میں نو نئے روٹس کا اضافہ کیا گیا ہے جس کے بعد روٹس کی تعداد 24 ہوگئی ہے جب کہ روٹ نمبر گیارہ میں توسیع کی گئی ہے جو خصوصی روٹ والی بسوں کے لیے مختص ہے۔
دوسرے مرحلے میں شہر کے متعدد علاقوں کے لیے 500 بس اسٹینڈز کے ذریعے 223 اضافی بسیں چلائی جائیں گی۔560 سے زیادہ بسیں 1100 سے زیادہ بس اسٹینڈز سے گزریں گی۔ 1120 کلو میٹر کا علاقہ ان کی رینج میں ہوگا جب کہ بسوں کا مجموعی نیٹ ورک 1900 کلو میٹر کا ہے۔
ریاض بس سروس کے دوسرے مرحلے کے آغاز پر ’ریاض بس‘ ایپ میں مزید خصوصیات شامل کی گئی ہیں تاکہ بس سروس استعمال کرنے والے مناسب طریقے سے پلاننگں اور آسانی سے ٹکٹ خرید سکیں۔ اس ایپ کو اپ ڈیٹ کرکے اس میں اپنی منزل کا انتخاب کرنے کا موقع فراہم کیا گیا ہے۔ ٹکٹ سے متعلق کئی نئے آپشن بھی شامل ہیں۔
یہ ٹکٹ تین دن، سات یا ایک ماہ تک موثر رہے گا۔ ٹکٹ بس اسٹینڈز سے بھی خریدے جاسکتے ہیں اس جت علاوہ درب کارڈ یا ایپ کے ذریعے بھی حاصل کیے جاسکتے ہیں۔
ادارے کا کہنا ہے کہ پہلے مرحلے کا آغاز شعبان میں کیا گیا تھا۔ ریاض بس سروس سے معاشرے کے مختلف طبقے فائدہ اٹھا رہے ہیں۔ توقع یہ ہے بس سروس شہر میں گاڑیوں کی تعداد کم کرنے میں کامیاب ہوگی اس سے شہر میں ٹریفک اژدحام بھی کم ہوگا۔