اسلام آباد ہائیکورٹ میں موسم گرما کی تعطیلات کا دورانیہ کیا ہو گا؟

اسلام آباد ہائیکورٹ میں 2 ماہ کے لیے موسم گرما کی تعطیلات ہوں گی، جس کا دوانیہ 10 جولائی سے 10 ستمبر تک ہوگا، آفس آرڈر جاری کر دیا گیا۔

اے آر وائی نیوز کے مطابق اسلام آباد ہائیکورٹ میں 2 ماہ کے لیے موسم گرما کی تعطیلات ہوں گی، جاری کیے جانے والے آفس آرڈر کے مطابق ہائیکورٹ میں 10 جولائی سے 10 ستمبر تک موسم گرما کی چھٹیاں ہوں گی۔

موسم گرما کی تعطیلات کے دوران فاضل ججز کا شیڈول جاری کر دیا گیا ہے، چیف جسٹس عامر فاروق اور جسٹس طارق محمود جہانگیری چھٹیوں میں دستیاب ہوں گے، دیگر6 ججز مختلف اوقات میں مقدمات کی سماعت کے لیے دستیاب ہوں گے۔

آفس آرڈر میں کہا گیا ہے کہ تعطیلات کے دوران ہنگامی نوعیت کی درخواستیں دائر کی جا سکیں گی، پیر سے جمعرات تک عدالتی اوقات صبح ساڑھے 9 سے دن ڈیڑھ بجے تک ہوں گے۔

جمعہ کو عدالتی اوقات صبح ساڑھے 9 سے دن 12 بجے کے درمیان ہوں گے جبکہ تعطیلات کے دوران دفتری اوقات صبح ساڑھے9 سے دن ساڑھے3 بجے تک رکھے گئے ہیں۔