سعودی عرب مختلف شعبوں میں روز افزوں ترقی کر رہا ہے اور 2040 میں اس کے دنیا کی 15 ویں بڑی معیشت بننے امکان ظاہر کیا جا رہا ہے۔
غیر ملکی میڈیا کے مطابق امریکی سرمایہ کاری بینک ’گولڈمین ساکس‘ کی حالیہ رپورٹ میں 2040 تک سعودی عرب دنیا کی 15 ویں بڑی معیشت بنے کی توقع ظاہر کی گئی ہے۔
جاری رپورٹ میں کہا گیا ہے کہ 2040 میں سعودی عرب کی متوقع جی ڈی پی 2.4 ٹریلین ڈالر (9 ٹریلین ریال) جبکہ مملکت کی آبادی 45 ملین تک پہنچ جائے گی۔
اسی رپورٹ میں یہ بھی کہا گیا ہے کہ 2040 میں چین، امریکا کو پیچھے چھوڑ کر 34.1 ٹریلین ڈالر جی ڈی پی کے ساتھ دنیا کی سب سے بڑی معاشی طاقت بننے جا رہا ہے جبکہ امریکا کی جی ڈی پی 32 ٹریلین ڈالر تک پہنچ جائے گی۔
گولڈ مین رپورٹ 2050 میں دنیا کی 6 بڑی معیشتوں کے بارے میں بتایا گیا ہے جس میں امریکا اور جرمنی کے علاوہ چین، انڈیا، انڈونیشیا اور جاپان شامل ہیں۔
رپورٹ میں عالمی معیشت کی رواں سال شرح نمو 3.1 فیصد پر برقرار اور آئندہ سال 3.2 فیصد تک مستحکم رہنے کی پیشگوئی بھی کی گئی ہے جب کہ ایشیا کی بڑی معیشتوں کو آنے والے برسوں میں دنیا کے امیر ترین ممالک کے ہم پلہ قرار دیا ہے۔
اس سے قبل عالمی مالیاتی فنڈ کی رپورٹ میں بھی 2030 تک 16 ایشیائی ممالک دنیا کے نمایاں ترین معیشتوں میں شامل ہونے کا امکان ظاہر کیا گیا تھا۔
واضح رہے کہ اقوام متحدہ کے اعداد وشمار کے مطابق آئندہ 30 برسوں کے دوران دنیا کی آبادی میں 2 ارب کا اضافہ متوقع ہے اور 2050 میں دنیا کی آبادی 9.7 ارب تک پہنچ جائے گی۔