آئی سی سی ٹی 20 ورلڈ کپ رواں سال جون میں ویسٹ انڈیز اور امریکا میں کھیلا جائے گا نیویارک میں زیر تعمیر ناساؤ کاؤنٹی انٹرنیشنل کرکٹ اسٹیڈیم تین ماہ میں مکمل ہونے کا امکان ہے۔
آئی سی سی ٹی 20 ورلڈ کپ رواں سال جون میں امریکا اور ویسٹ انڈیز کی مشترکہ میزبانی میں کھیلا جائے گا۔ 3 جون سے 29 جون تک جاری رہنے والے مختصر فارمیٹ کے اس میگا ایونٹ میں ریکارڈ 20 ٹیمیں شرکت کر رہی ہیں۔
نیویارک میں زیر تعمیر ناساؤ کاؤنتی انٹرنیشنل کرکٹ اسٹیڈیم کو ٹورنامنٹ کے 9 جون کو ہونے والے سب سے بڑے مقابلے پاک بھارت ٹاکرے سمیت 8 میچوں کی میزبانی سونپی گئی ہے۔ 3 جون کو ورلڈ کپ کا باقاعدہ آغاز بھی اسی کرکٹ اسٹیڈیم میں سری لنکا اور جنوبی افریقہ کے درمیان میچ سے ہوگا۔
کرکٹ اسٹیڈیم کے حوالے سے آئی سی سی کی ویب سائٹ پر شائع ایک رپورٹ کے مطابق اس اسٹیڈیم میں 34 ہزار تماشائیوں کے بیٹھنے کی گنجائش ہوگی جہاں تماشائیوں کے لیے پریمیئم، عمومی اور وی آئی پی نشستوں کے علاوہ پارٹی ڈیک اور شیڈز کی سہولیات بھی ہوں گی۔
اس اسٹیڈیم میں کرکٹ شائقین کے علاوہ مہمانوں کے لیے بھی بھرپور انتظامات ہوں گے۔ مختلف طرح کے کھانوں، مشروبات کے آوٹ لیٹس کے ساتھ ساتھ میڈیا اور براڈ کاسٹنگ کے اسٹیٹ آف دی آرٹ پوائنٹس بھی ہوں گے۔
اس کے علاوہ ناساؤ کاؤنٹی انٹرنیشنل کرکٹ اسٹیڈیم کے لیے ایڈیلیڈ اوول اور ایڈن پارک کی طرز کی ڈراپ اِن اسٹائل اسکوائر پچ فلیوریڈا میں تیار کی جا رہی ہے جسے مئی کے اوائل میں نیویارک منتقل کیا جائے گا۔
مین ہیٹن سے 48 کلومیٹر جنوب میں واقع اس سٹیڈیم تک ٹرانسپورٹ اور پارکنگ کی بہترین سہولیات فراہم کی جائیں گی جس میں تین ریلوے اسٹیشن بھی ہوں گے۔
آئی سی سی کا کہنا ہے کہ ناساؤ کاؤنٹی انٹرنیشنل کرکٹ اسٹیڈیم کے منصوبے میں پائیداری کو سب سے زیادہ ترجیح دی جا رہی ہے۔ جو گرینڈ سٹینڈز فارمولا ون لاس ویگاس گرینڈ پرِکس کے لیے استعمال کیے گئے تھے، انہیں ٹی20 ورلڈ کپ کے لیے دوبارہ تیار کیا جا رہا ہے۔
یہ پروجیکٹ دنیا میں معروف ترین اسٹیڈیمز بنانے کے لیے مشہور تعمیراتی کمپنی ’پاپولوس‘ کی ٹیم نے ڈیزائن کیا ہے۔ اسی کمپنی نے انڈیا کے شہر احمد آباد میں نریندر مودی اسٹیڈیم اور لندن کا ٹوٹنہم ہاٹ پور اسٹیڈیم ڈیزائن کیا ہے جب کہ نیویارک میں بیس بال اسٹیڈیم نیویارک یانکیز اور نیو یارک میٹس بھی اسی کمپنی کا شاہکار ہیں۔
آئی سی سی کے چیف ایگزیکٹو جیوف الارڈائس نے کہا ہے کہ ہم ناساؤ کاؤنٹی انٹرنیشنل کرکٹ اسٹیڈیم کی آئی سی سی ٹی 20 ورلڈ کپ 2024 سے پہلے رونمائی کے لیے پرجوش ہیں۔ یہ آئی سی سی کے سب سے بڑے ایونٹ کے لیے ایک اہم سنگ میل ہو گا اور ہماری کوشش ہوگی کہ نیویارک میں ٹی20 ورلڈ کپ کے کھلاڑیوں اور شائقین کرکٹ کو ناقابل فراموش تجربے سے ہمکنار کیا جا سکے۔