حکومت پاکستان نے قومی ایئر لائن پی آئی اے کی نجکاری اور ہوائی اڈوں کی آؤٹ سورسنگ کا فیصلہ کیا ہے جس میں دنیا کے کئی ممالک نے دلچسپی ظاہر کی ہے۔
اے آر وائی نیوز کے مطابق وفاقی وزیر دفاع، دفاعی پیداوار اور ہوا بازی خواجہ محمد آصف کی زیر صدارت وزارت ہوا بازی میں ہوائی اڈوں کی آؤٹ سورسنگ اور پی آئی اے کی نجکاری سے متعلق اجلاس ہوا جس میں سیکرٹری ایوی ایشن، سیکرٹری نجکاری کمیشن، ایڈیشنل سیکرٹری وزارت خارجہ اور دیگر سینئر افسران نے شرکت کی۔
اجلاس میں انٹرنیشنل فنانس کارپوریشن (آئی ایف سی) نے وفاقی وزیر کو بتایا کہ جرمنی، فرانس، نیدر لینڈز، قطر، یو اے ای، ملائیشیا اور ترکی سمیت سات بین الاقوامی سرمایہ کاروں نے آوٹ سورسنگ میں اپنی دلچسپی ظاہر کی ہے جبکہ مقامی گروپس بھی اس لین دین میں دلچسپی رکھتے ہیں۔
اس موقع پر وزیر ہوا بازی نے مذکورہ ممالک میں پاکستانی سفیروں کے ساتھ آن لائن ایک میٹنگ بلانے اور انہیں ایوی ایشن کی طرف سے تیار کردہ مخصوص بریف فراہم کرنے اور دلچسپی رکھنے والے گروپوں کے ساتھ فعال طور پر رابطے میں رہنے کی ہدایت کی۔
خواجہ آصف نے مقامی سرمایہ کاروں کو بین الاقوامی سرمایہ کاروں کے ساتھ جوڑنے کا مشورہ بھی دیا تاکہ لوکل سرمایہ کاروں کی آگاہی میں اضافہ ہو سکے اور وہ اپنے کنسورشیم کو تیار کر کے بولی کے عمل میں حصہ لے سکیں۔
اس موقع پر سیکرٹری نجکاری کمیشن عثمان اختر باجوہ نے وزیر کو مارکیٹنگ پلان اور PIACL کی نجکاری کے لین دین پر متحدہ عرب امارات، قطر، سعودی عرب اور ترکی سمیت بین الاقوامی سرمایہ کاروں کے ساتھ ابتدائی مصروفیات کے بارے میں آگاہ کیا۔
وفاقی وزیر نے ان ممالک کا دورہ کرنے کی ہدایت کی تاکہ وہ ممکنہ سرمایہ کاروں کے ساتھ فعال روابط قائم کر کے نجکاری میں دلچسپی رکھنے والے گروپس کو پاکستان میں لے کر آئیں۔ انہوں نے حکومتی سطح پر دونوں ٹرانزیکشن میں معاونت کی یقین دہانی بھی کرائی۔