ایچ بی ایل پاکستان سپر لیگ 8 میں گزشتہ روز لاہور قلندر نے کوئٹہ گلیڈیئٹرز کو با آسانی زیر کرلیا کپتان سرفراز نے شکست کی وجہ بھی بتا دی۔
اے آر وائی نیوز کے مطابق ایچ بی ایل پاکستان سپر لیگ 8 کے سنسنی خیز مقابلے جاری ہیں۔ گزشتہ روز ایونٹ کے دسویں میچ میں دفاعی چیمپئن لاہور قلندرز نے سابق پی ایس ایل چیمپئن کوئٹہ گلیڈیئٹرز کو با آسانی زیر کرلیا۔ یہ رواں سیزن میں کوئٹہ کی کھیلے گئے چار میچز میں تیسری شکست تھی۔
میچ کے بعد کوئٹہ گلیڈیئٹرز کے کپتان سرفراز احمد نے شکست کی وجہ بھی بتا دی اور کہا کہ ہسارانگا کے نہ آنے سے ٹیم کا پورا کمبی نیشن خراب ہوگیا ہے۔
ان کا کہنا تھا کہ ہماری ٹیم ہسارانگا پر انحصار کر رہی تھی لیکن سری لنکن بورڈ نے انہیں این او سی نہیں دیا جس کی وجہ سے ہمیں مشکلات پیش آ رہی ہیں۔
یہ بھی پڑھیں: پی ایس ایل: سری لنکن اسپنر کی شرکت کے امکانات ختم
واضح رہے کہ پی ایس ایل 8 کے گزشتہ روز کھیلے گئے میچ میں لاہور قلندرز نے کوئٹہ گلیڈیئٹرز کو یکطرفہ مقابلے کے بعد 63 رنز سے شکست دی تھی۔ لاہور کے 198 رنز کے جواب میں کوئٹہ کی ٹیم مقررہ 20 اوورز میں 8 وکٹوں کے نقصان پر 135 رنز تک محدود رہی تھی۔