عالمی ویٹرنز کپ، پاکستان ٹیم کی قیادت کا تاج کس کے سر سجا؟

کراچی میں منعقد ہونے والے اوور 40 کرکٹ گلوبل کپ کے لیے پاکستان ویٹرنز ٹیم کے کپتان کا اعلان کر دیا گیا ہے مصباح الحق قیادت کریں گے۔

ویٹرنز کرکٹ گلوبل کپ اوور 40 کا آغاز منگل 19 ستمبر کو شہر قائد میں ہو رہا ہے۔ ایونٹ میں مجموعی طور پر 36 میچز کھیلے جائیں گے جب کہ پاکستان اپنے تمام میچز نیشنل بینک کرکٹ اسٹیڈیم میں کھیلے گی۔

پاکستان ویٹرنز کی قیادت سابق قومی کپتان مصباح الحق کریں گے جب کہ جارح مزاج آل راؤنڈر عبدالرزاق ان کے نائب ہوں گے۔

ٹیم میں بوم بوم شاہد آفریدی، محمد سمیع، حسن رضا، طارق ہارون، خرم علی خان (وکٹ کیپر)، وقاص احمد، عبدالقادر، محمد رضوان اسلم، کاشف صدیق، محمد الیاس، افضل شاہ (وکٹ کیپر)، امجد علی، عمران علی، تصور عباس، عدنان رئیس، جنید خلیل نینی تال والا شامل ہیں جب کہ ریزرو کھلاڑی یاسر حمید، حارث ایاز، شہزاد ملک ہوں گے۔

پاکستان ویٹرنز کرکٹ ایسوسی ایشن کے سربراہ فواد اعجاز خان کے مطابق سابق فاسٹ بولر جلال الدین کو اوور 40 کرکٹ گلوبل کپ کیلئے پاکستان ٹیم کا کوچ جبکہ اعظم خان کو منیجر مقرر کیا گیا ہے۔

ایونٹ میں پاکستان اپنی مہم کا آغاز 19 ستمبر کو امریکا کیخلاف میچ کے ساتھ کرے گا۔