لندن: ورلڈکپ 2019 کے وارم اپ میچ میں انگلینڈ نے افغانستان کی ٹیم کو 9 وکٹوں سے شکست دے کر آؤٹ کلاس کردیا۔
تفصیلات کے مطابق لیڈز کے اوول گراؤنڈ میں ورلڈ کپ 2019 کا وارم اپ میچ افغانستان اور انگلینڈ کی ٹیموں کے مابین کھیلا گیا جس میں افغان ٹیم نے پہلے بیٹنگ کرتے ہوئے صرف 160 رنز بنائے۔
انگلینڈ کی ٹیم نے ہوم گراؤند کا بھرپور فائدہ اٹھاتے ہوئے افغانستان کی ٹیم کو مختصر اسکور تک محدود رکھا۔ افغانستان کی جانب سے محمد نبی کے علاوہ کوئی بھی بلے باز انگلش باؤلرز کے سامنے زیادہ دیر تک نہ ٹک سکا اور پوری ٹیم 39 ویں اوور میں ہی ڈیر ہوگئی۔
محمد نبی 44 اور نور علی زردان 30 رنز بنا کر نمایاں بلے باز رہے جبکہ انگلینڈ کی جانب سے جو روٹ اور جوفرا آرچر نے تین تین کھلاڑیوں کو آؤٹ کیا۔
مزید پڑھیں: وارم اپ میچ، افغانستان نے پاکستان کو 3 وکٹوں سے شکست دے دی
انگلینڈ کی ٹیم نے ہدف کے تعاقب میں پہلے ہی اوور سے جارحانہ کھیل کا مظاہرہ کیا اور 18ویں اوور میں ہی ایک وکٹ کے نقصان پر ہدف باآسانی حاصل کرلیا۔
انگلش ٹیم کے بلے باز جیسن رائے نے 46 گیندوں پر 89 رنز جب کہ جونی بیئراسٹو نے 22 گیندوں پر 39 رنز کی اننگز کھیلیں۔ جو وٹ 29 رنز بنا کر آؤٹ ہوئے۔ ٰیاد رہے کہ افغانستان کی ٹیم نے پہلے وارم اپ میچ میں پاکستان کو تین وکٹوں سے شکست دے کر ورلڈکپ کا پہلا اپ سیٹ کیا تھا۔