دنیا کا سب سے بڑا اور پُر تعیش بحری جہاز آئیکون آف دی سیز اپنے پہلے سفر پر امریکی شہر میامی کے ساحل سے روانہ ہو گیا ہے۔
امریکی نشریانی ادارے کی رپورٹ کے مطابق دنیا کا سب سے بڑا 1198 فٹ لمبا اور 165 فٹ چوڑے بحری جہاز آئیکون آف دی سیز امریکی ریاست فلوریڈا کے شہر میامی کی بندرگاہ سے اپنے پہلے سفر پر روانہ ہو گیا ہے۔
7 دن کے طویل سفر سے لطف انداز ہونے کے لیے بحری جہاز میامی سے مشرقی کیریبین تک جائے گا، یہ راستے میں ٹروپیکل علاقوں میں مختلف جزائر کا دورہ کرے گا۔ دورانِ سفر 50 کے قریب موسیقار اور کامیڈین مسافروں کو محظوظ کریں گے۔ آئیکون آف دی سیز کی تعمیر کے لیے 2 ارب ڈالرز کی لاگت آئی ہے۔
اس جہاز کا وزن ڈھائی لاکھ ٹن سے زیادہ ہے اور اسے جدید ٹیکنالوجی کے تحت یورپ کے سب سے بڑے شپ یارڈ میں فن لینڈ میں تیار کیا گیا اور اس کی تیاری کے لیے 2600 مزدوروں نے روزانہ کی بنیاد پر خدمات سر انجام دیں۔
اب تک بنایا جانے والا سب سے پُرتعیش یہ بحری جہاز ایک صدی قبل ڈوبنے والے جہاز ٹائٹینک سے بھی پانچ گنا بڑا ہے۔ 20 منزلوں پر مشتمل اس بحری جہاز میں 7 ہزار سے زائد مسافروں سمیت 10 ہزار افراد کی گنجائش ہے۔
بحری جہاز بنانے والی کمپنی ’رائل کیریبیئن انٹرنیشنلز آئیکون‘ کی جانب سے سفر کو خوبصورت اور یادگار بنانے کے لیے اس میں تمام تر سہولتیں فراہم کی گئی ہیں۔
آئیکون آف دی سیز میں ایک ہزار کے قریب پرتعیش کمرے یا کیبن موجود ہیں۔ جہاز میں 7 بڑے سوئمنگ پولز، 6 واٹر سلائیڈز، 40 سے زائد ریستوران، بار اور لاؤنچ اور کھیلوں کے میدان بھی موجود ہیں جب کہ سوئمنگ پولز اور تفریحی میدانوں کو بچوں اور بالغوں کے لیے الگ الگ رکھا گیا ہے۔
جہاز میں رات کے وقت تفریح کے لیے خصوصی لائٹس کا بھی اہتمام کیا گیا ہے جب کہ جہاز میں کچھ ایسے مقامات بھی موجود ہیں جہاں شیشے کی دیواریں ہوں گی اور سمندر کے نظارے بھی دیکھنے کو ملیں گے۔