قرآن پاک کی بے حرمتی کے خلاف پاکستان میں آج ‘یوم تقدیس قرآن’ منایا جارہا ہے

یوم تقدیس قرآن

اسلام آباد : سوئیڈن میں قرآن پاک کی بے حرمتی کے خلاف پاکستان بھر میں آج یوم تقدیس قرآن منایا جارہا ہے، وزیراعظم شہباز شریف نے پوری قوم سے بھرپور احتجاج ریکارڈ کرانے کی اپیل کی ہے۔

تفصیلات کے مطابق سوئیڈن میں قرآن پاک کی بے حرمتی کے شرمناک عمل کے خلاف اُمت مسلمہ کا شدید احتجاج جاری ہے، پاکستان میں بھی آج "یومِ تقدیس قرآن” منایا جارہا ہے۔

وزیراعظم شہبازشریف کی جانب سے پوری قوم سے بھرپور طریقے سے شرکت کرنے کی اپیل کی گئی ہے، نماز جمعہ کے بعد ملک بھر میں پرامن احتجاجی جلوس نکالے جائیں گے، جن میں زندگی کے مختلف شعبوں سے تعلق رکھنے والے افراد شرکت کریں گے۔

پرامن احتجاجی ریلیوں میں سویڈن میں قرآن پاک کی بے حرمتی کے واقعے کی بھرپور مذمت کی جائے گی اور مختلف مکاتب فکر کے علماء جمعہ کے خطبات کے دوران قرآن کریم کے تقدس پر روشنی ڈالیں گے۔

گزشتہ روز پارلیمنٹ کے مشترکہ اجلاس میں واقعے کے خلاف مذمتی قرارداد بھی متفقہ طور پر منظور کی گئی تھی، قرارداد کے متن میں کہا گیا تھا کہ ایوان سوئیڈن میں قرآن پاک کی بے حرمتی کی شدید الفاظ میں مذمت کرتا ہے اور ایسے واقعات کی روک تھام کیلئےعالمی برادری کی توجہ چاہتا ہے۔

وزیراعظم شہباز شریف کا کہنا تھا قرآن پاک اور نبی صلی اللہ علیہ والہ وسلم کی شان میں گستاخی برداشت نہیں، تحمل کامطلب یہ نہیں کہ ہمیں جواب دینا نہیں آتا، آئندہ ایسی حرکت ہوئی توکوئی ہم سےگلہ نہ کرے۔