اسپین کی ٹیم یورو کپ کے فائنل میں پہنچ چکی تاہم آپ یہ جان کر حیران رہ جائیں گے کہ نوجوان اسپینش فٹبالر لامین یمال کو ایک شرط پر ٹورنامنٹ کھیلنے کی اجازت ملی۔
جرمنی میں کھیلے جا رہے یورو کپ میں اسپین کو سیمی فائنل میں پہنچانے میں اہم کردار ادا کرنے والے 16 سالہ فٹبالر لامین یمال اس وقت عالمی توجہ کا مرکز بنے ہوئے ہیں، جس کی وجہ ان کی میدان میں کارکردگی کے ساتھ میچ کے بعد اسکول کا ہوم ورک کرنا بھی شامل ہے۔
یمال نے سیمی فائنل میں فرانس کے خلاف شاندار گول کر کے نہ صرف اپنی ٹیم اسپین کو فائنل میں پہنچایا بلکہ یورو کپ کی تاریخ کے سب سے کم عمر گول کرنے والے فٹبالر کا اعزاز بھی اپنے نام کیا۔
تاہم آپ یہ جان کر حیران رہ جائیں گے کہ یمال کو اس کے اسکول ٹیچر نے اس شرط پر یورو کپ کھیلنے کی اجازت دی کہ وہ روانہ ہوم ورک کرے گا۔
نوجوان فٹبالر سے یہ صرف زبانی وعدہ نہیں لیا گیا بلکہ انہیں میچ کے بعد ہوم ورک کر کے اپنے ٹیچر کو ای میل بھی بھیجنی ہوتی ہے۔
اس لیے میچ سے فراغت پاتے ہی اسپینش کھلاڑی اپنا اسکول بیگ کھول کر ہوم ورک کرنے میں مصروف ہو جاتے ہیں۔
لامین یمال کو صرف ہوم ورک نہیں کرنا پڑتا بلکہ جرمنی کے ٹین ایجر ایتھلیٹ قانون کے مطابق وہ رات گیارہ بجے کے بعد کسی سرگرمی میں حصہ نہیں لے سکتے اس لیے وہ پورا میچ بھی نہیں کھیل پاتے۔
تاہم اسپین کی خوش قسمتی ہے کہ لامین یمال جو فائنل میچ سے ایک دن قبل 17 سال کے ہو جائیں گے فائنل میچ میں وہ ٹین ایجر ایتھلیٹ قانون کی قید سے آزاد ہوں گے۔
بارسلونا کلب نے یمال کو شہرت بخشی۔ یورو کپ میں اس شاندار کارکردگی کے بعد ان کی قدر وقیمت میں بھی اضافہ ہوچکا ہے اور اگر کسی اور کلب نے یمال کو لینا ہے تو بارسلونا اس کے بدلے 868 ملین پاؤنڈ مانگتا ہے۔
واضح رہے کہ جرمنی میں کھیلے جا رہے یورو کپ میں اسپین فرانس کو شکست دے کر فائنل میں جگہ بنائی جب کہ انگلینڈ نے نیدر لینڈ کو ہرا کر دوسرا سیمی فائنل جیتا۔
اتوار 14 جولائی کو انگلینڈ اور اسپین کے درمیان فائنل مقابلہ برلن میں کھیلا جائے گا۔