زوب میں سیکیورٹی فورسز کے انٹیلیجنس بیسڈ آپریشن میں 33 خارجی ہلاک ہوگئے۔
پاک فوج کے شعبہ تعلقات عامہ (آئی ایس پی آر) سیکیورٹی فورسز نے بھارتی حمایت یافتہ دہشت گردوں کے خلاف سمبازہ میں انٹیلیجنس بیسڈ آپریشن کیا اس دوران 33 خارجی ہلاک ہوگئے۔
ترجمان پاک فوج کا کہنا ہے کہ فتنہ الخوارج کے دہشت گرد پاک افغان سرحد پر دراندازی کی کوشش کررہے تھے، سیکیورٹی فورسز نے موثر انداز میں دراندازی کی کوشش ناکام بنائی۔
آئی ایس پی آر کے مطابق ہلاک دہشت گردوں سے ہتھیار، گولیاں اور دھماکا خیز مواد برآمد ہوا ہے۔
ترجمان پاک فوج کا کہنا ہے کہ ممکنہ دہشت گردوں کے خاتمے کے لیے کلیئرنس آپریشن جاری ہے، سیکیورٹی فورسز بھارتی حمایت یافتہ دہشت گردی کے خاتمے کے لیے پرعزم ہے۔
یہ پڑھیں: آئی ای ڈی سے فورسز کی گاڑی ٹکرا گئی، میجر سمیت 3 جوان شہید
آئی ایس پی آر کا کہنا ہے کہ بھارتی حمایت یافتہ دہشت گردی کا خاتمہ یقینی بنائیں گے۔
واضح رہے کہ دو روز قبل بلوچستان کے علاقے مستونگ میں فتنہ الہندوستان کی آئی ای ڈی سے سیکیورٹی فورسز کی گاڑی ٹکرا گئی تھی۔
ترجمان پاک فوج کا کہنا تھا کہ آئی ای ڈی دھماکے میں میجر محمد رضوان طاہر سمیت 3 فوجی جوان شہید ہو گئے۔ شہدا میں نائیک ابن امین اور لانس نائیک محمد یونس شامل ہیں۔
سیکیورٹی فورسز کے علاقے میں کلیئرنس آپریشن کے دوران 4 دہشت گرد مارے گئے تھے۔
آئی ایس پی آر کا کہنا تھا کہ سیکیورٹی فورسز بھارتی اسپانسرڈ دہشت گردی کے خاتمے کےلیے پُرعزم ہیں، بہادر جوانوں کی یہ قربانیاں ہمارے عزم کو مزید تقویت دیتی ہیں۔